kaummudapergerakan.blogspot.com_ Kaoca’ sè aghâbây labâng gâliḍighân bessè
lebbi sataon, anangèng ghi’ ta’ marè. Ḍhi-panḍhi sè bânnya’ paḍâ gerring, bâḍâ
matè kapanasan. Saellana labâng sè èkaghâbay rèya la karè pèjerranna,
sabânnya’na panḍhi taḍâ’ tao mèjerri, locot bhâi. Amarghâ jârèya Soltan benḍu
ka Patè Gajamada.
Nyè Empo ngèding berta, lamon Empo Kelleng sakè’, lajhu
ngoca’ ka Gus Tole, oca’na: “Gus, dhika èntar nyosol eppa’na. Empo Kelleng ka
Majapaèt, kabârrâ gerring kongsè bâdânna kakorosen. Dhika nyosol sambi nolongè
lalakonna eppa’na.”
Saellana jârèya Agus Tole pas ajhâlân kadhibi’ân kalabân
sossa atèna, sabâb abâ’na ta’ tao ka jhâlânna Madjapaèt, kobâtèr tako’ èlang
otabâ tabâbâs ka alas, lajhu èkakan macan. Ta’ abit sè ajhâlân la napa’a ka
tengnga alas, lajhu tatemmo bi’ orèng lalakè’ robâna cè’ bhâgussâ, atapa è
konco’na gâlâgâs, iyâ arèya Adirasa. Agus Tole lajhu èkobâ’i, dhuli nyander.
Adirasa atanya: “Bâ’na èntara ḍâ’ emma, ma’ ajhâlân
kadhibi’ân?
Agus Tole: “Sampèyan pasèra?”
Adirasa: “Sèngko’ arèya anyama Adirasa, majhâḍi’na bâ’na,
tarètanna eppa’na.”
Agus Tole: “Kaulâ sè ajhâlân panèka parlo nyosol eppa’ ka
Naghârâ Majapaèt.”
Adirasa: “Sèngko’ atotora, jhâ’ ramana anyama Adipoday.
Sarta atotor dari awwal ka ahèr taḍâ’ cèccèr.
Agus Tolé: “Manabi sapanèka kaulâ ngèrènga sampèyan bisaos.”
Adirasa: “Aḍhu, ella, sèngko’ ta’ èkennèng toro’è bâ’na.
Lamon bâ’na nemmo kasossa’an, dhuli bâ’na ngolok nyama sèngko’, sèngko’ bhâkal
dâteng nolongè kasossa’anna bâ’na.”
Saellana jârèya Agus Tole pas èburuk èlmo sè mar-samar, apa
polè èmo sè lahir. Saellana Adirasa pas aḍhâbu polè: “La kassa’ bâ’na dhuli
ajhâlân nyosol eppa’na ka Majapaèt, sabâb eppa’na sè malarat arabadhi bâ’na ḍâri
ghi’ kènè’ kongsè satèya, ollèa bâ’na males kabeccè’an sè lebbi rajâ. Rèya’
kembhâng kakan bâ’na, arèya paghi’ dhaddi pajerrâ labâng bessè Majapaèt. Anangèng
bâ’na kodhu èobbhâr dâllu èpapoṭṭon. Ḍâpa’ bâ’na poṭṭon, pèjerrâ lajhu kalowar ḍâri
bujellâ, jârèya ghâcang kala’ lolongnga, bâ’na pas soro duli sèrami aèng,
sopajâ bâ’na oḍi’ polè. Saellana jârèya labâng bessè pas obbhâr polè, ḍâpa’
apoyya la rebbâng, bâ’na alebbhu ka ḍâlem apoy, pas pajerri.”
Agus Tole duli nampanè kembhâng, buru pas èkakan taḍâ’ karè.
Adirasa ngoca’ polè: “Bâ’na bâḍâ tarètan sadulurrâ, anyama
Agus Wedi, iyâ arèya satèya bâḍa è
bâbâna kaju bâringèn, ghun è bârâ’ rowa. Mèlana bâ’na kodhu nyepper, pas
kabhâreng.”
Agus Tole mator èngghi, pas nyongkem ka Adirasa sambi amèt,
pas ajhâlân kadibi’ân ḍing-ngenḍing ḍâ’ bârâ’ sambi lok-ologhân, anangèng taḍâ’
nyambidhi. Agus Tole lajhu ajunjung tanangnga ḍukalajâ, nyo’on ka Gustè Allah
mandâr ètemmoaghiyâ kalabân tarètanna, Agus Wedi, sambi ngolok bâriyâ: “Alè’
Wedi, nèko bulâ tarètanna dhika, anyama Tole. Eh, bhâ’ bâḍâ’â ḍimma iyâ’ana
sang tarètan jârèya.”
Sakejjâ’agghi’ lajhu bâḍâ
na’-kana’ kasorang ngombâr kalowar ḍâri bâbâna beringèn, iyâ arèya Agus Wedi.
Pangombârrâ paḍâ mèsem, sarta lajhu paḍâ tao jhâ’ tarètanna. Sè kaduwâ paḍâ
bhâghus. Cahyana tèra’, robâna mara pènang sègi’ ḍuwâ. Sè kaduwâ jârèya
saellana amèt ka Ke Pademmabu pas paḍâ ajhâlân èntara ka Majapaèt. (5-7)
Komentar
Posting Komentar