Bhâbhâd Songennep Bâgiân III

Kaummudapergerakan. Ekala panḍâ’na carèta, bhâbhâji’ pas è èmbhân, èghibâ molè ka bengkona. Binèna cè’ bhungana kèya, marghâ ollè ana’. È bâkto jarèya Nyè Empo dhuli nampanè bhâbhâji’, sarta lajhu èrèbâ sambi èromrom. Tèngkana mara orèng sè rèmbi’ ongghu, lajhu ajhâmo papejjâ, sarta sosona ekoṭṭo’ ka bâghung sajjâna sopajâ mettoa aèng soso, marghâ terro nyosoana bhâbhâji’ jarèya, anangèng kongsè pan-bârâmpan arè ta’ ghellem kaloar aèng soso, karana Nyè Empo jarèya maskè omorra la towa ta’ tao nganḍung  bhâlâkka’. Dhaddi salanjhângnga bhâbhâji’ jarèya nyoso powanna kerbuy potè molos ghellâ’. Bhâbhâji’ jarèya satèya ènyamaè Jakatole (Agus Tole).

Molaè Kè Empo sè anḍi’ ana’ Jakatole sèyang malem ta’ pegghâ’ sakalè tamoyya sè nyapot sarta kalabân lè-ollèna. Bâḍâ sè abherri’ pèssè kongsè lèma rèyal, èsoro kabelli angghuyyâ Jakatole. Sajegghâ Empo Kelleng anḍi’ ana’ ta’ kakorangan pa-apa, la-mala kongsè andâddhiyâghi mampona, coma ḍâri paberri’na rèng-orèng sè paḍâ nyapot.

Kaoca’ satèya Dhinaju Potrè Konèng asopenna polè kadâtengan orèng sè ghi’ bilân rowa, kongsè èkapolong asarèn polè. Paḍâkala Dhinaju Potrè Konèng takerjhât lajhu abungo, sakejjhâ’ toju’, sakejjhâ’ ajhukep ka gulingnga, marghâ ngaghâli sopennana, sarta tako’ bhubhut polè, ghâlina bâriyâ: “Mon sèngko’ nganḍung polè, ta’ burung èpatè’è bi’ rama ebhu, sabâb rama ebhu tanto nyangka bâriyâ; Molana ta’ ghellem sè èpalakèana, sabâb ella anḍi’ bur-lèburân malèng saktè.”

Ḍâri sabâb pangghâliânna mara jârèya, Dhinaju Potrè Konèng lajhu molar kongsè sèsègumen. Bhâreng èkaeḍing Bu’ embhânna, pas ètanya’aghi: “Aponapa Dhinaju, Junan dhâlem ma’ bhuruânna abungo tengnga malem lajhu molar, ḍu sabbânna mon abungo pas mondhut bullu, terros asalat, maos Al-Qur’an kongsè ghi’ lagghu.”

Dhinaju Potrè Konèng nganḍhika: “Bu’, sèngko’ amèmpè...” È jâḍiyâ pas ètotoraghi sopennana bân sè dhâddi sabâbbhâ molar.

Bu’ embhânna mator bâriyâ: “Bunten junan dhâlem jhâ’ kabetèr. Lerres macan panèka ghâlâk, anangeng molaè ghi’ kona didhâlem ta’ mèreng berta bâḍâ macan neḍḍhâ buḍu’na.”

È kala panḍâ’na carèta, Dhinaju Potrè Konèng lajhu bhubhut, anangeng rama ebhuna ta’ nganḍhika pa-apa, sabâb jârèya èsangka panyakèddhâ sè bilân polè.

Saellana kanḍunganna Dhinaju Potrè Konèng la genna’ bulânna, è bâkto tengnga malem lajhu bhâbâr lalakè’ kèya, robâna taḍâ’ bhidana bi’ Jakatole. Bhâbhâji’ jârèya èkarsa’aghi buâng kèya ka alas bâremma sè ghi’ dhâllu rowa. È bâkto jârèya kèya parnyaè dhuli kaloar, ngebhân bhâbhâji’, èghibâ ajhâlân ḍa’ lao’, èbuâng ka alas èsabâ’ è bâbâna kajuân rajâ, sè dhaddi paambuân bân katèḍhunganna mano’.

È bâbâna kaju jâḍiyâ talèbât sobungnga, taḍâ’ lampaddhâ jhâlânna orèng sakalè. Dhinèng sè dhaddi oḍi’na bhâbhâji’ jârèya, iyâ sabâb sabânnya’na mano’-mano’ sè paḍâ ambu, apa polè mano’ sè ngènep è kajuân jâḍiyâ, paḍâ nyocor ka colo’na mara sè adhulâng buḍu’na (3-4)