Kaummudapergerakan- Bhârâng sè bhubhut genna’ bulânna, è nalèka sèttong malem teppa’ tangghâl pa’-bhâllâs Dhinaju Potrè Konèng bhâbhâr alaheraghi bhâbhâji’ lalakè’ kasorang, taḍâ’ ḍhârâ bi’ tamonèna, robâna talèbât bhâghus, cahyana tèra’ bennèng taḍâ’ bidhâna bi’ orèng lalakè’ sè èkamèmpè apolong tèḍung ghellâ’.
Serrèna talèbât tako’ bân malo ka rama-èbhuna, marghâ tako’ èsangka ajhâlân jhubhâ’, Dhinaju Potrè Konèng lajhu ngandhika ka parnyaèna, ḍhâbuna: “Bu’, bhâbhâji’ rèya buwâng bhâi ka alas sè jhâu ḍâri naghârâ ḍinna’. Anangèng sènga’, yâ, Bu’, jhâ’ sabâ’ è kennenganna macan, sèngko’ nèser tako’ èkakan”.
Parnyaè mator èngghi, pas kalowar ḍing-ngenḍing sambi ngembhân bhâbhâji’ ghellâ’ èghibâ ajhâlân ḍâ’ lao’.
Saellana para’ metto arè parnyaè ghellâ’ napa’ ka alas ghunong lao’. Serrèna tako’ katemmon ka orèng, dhaddi bhâbhâji’ pas èsabâ’ è bâbâna kajuân rajâ, èḍung-koḍungè ḍâun, pas èondhuri, parnyaè terros molè abâli ka karaton. Dhinaju Potrè Konèng marèksa kabaḍâ’ânna sè mowang bhâbhâji’ ghellâ’, parnyaèna iyâ mator bârâmma sè kasebbhut.
Kaoca’ neng è dhisa Pakanḍângan (Kanḍângan) (satèya noro’ Onderdistrik Bluto). Bâḍâ sèttong orèng lalakè’ anyama Empo Kelleng, lalakonna dhaddi empo (panḍhi). Abâ’na cè’ terrona anḍi’â anak, tapè ta’ ghellem katekkan. Sakèng talebaddhâ terro, abâ’na kongsè entar adhukon san-kassanaghi, anangèng ghi’ ta’ ghellem anḍi’ ana’ kèya. Dhinèng empo jârèya bu-obuânna kerbhuy pan-bârâmpan mègghi’. Sabbhân ghi’ lagghu kerbhuyyâ paḍâ élombhâr ka alas, sèpat para’ compet arè ḍâteng dhibi’, pas alebbhu ka kanḍhângnga.
È antarana kerbhuy sè bânnya’ ghellâ’ bâḍâ sèttong bâbinè’, sè abulu potè molos, sarta ghus-bhâghusân, nalèka bhâbhâji’ ghellâ’ èbuwâng ka alas, kerbhuy potè jârèya kateppa’an bhuru marè nyosoè (mèsa) buḍu’na.
Kalabân kasokanna Ghustè Sè Kobâsa, è bâjâ ghi’ lagghu teppa’na bhâbhâji’ ghellâ’ è buwâng ka alas, kerbhuy potè buru saellana èlombhâr, lajhu nyaloḍur, entar ka kennenganna bhâbhâji’ jârèya, sarta lajhu èsosoè. Apa polè abâ’na sambi ajhâgâ, sopajâ bhâbhâji’ jârèya ta’ kongsèya èkakan bhurun alas ghâlâk. Bâriya bhâi lakona rè-saarèna, sarta sabbhân molè mastè moḍi bhâi.
Amarghâ jârèya empo ghellâ’ lajhu nètènè pamolèna ḍâri sè èlombhâr, iyâ arèya mato moḍi bhâi kongsè pan-bârâmpan arè. Molana Empo Kelleng pas apèkkèr bâriyâ: “Ella bârâmpan arè engko’ noraè sang kerbhuy sè potè rèya, sèpat molè ḍâri palombhârânna mastè moḍi bhâi, sarta tabu’na ghi’ lapar, tanto bâḍa sabâbbhâ, karana cè’ bhidhâna bi’ sè èn-laènna, apa polè ropana ollè koros; rassa sèngko’ kerbhuy rèya bâḍâ mèghâ’, pas èpalako otabâ èn-laènna. Dhâllu bi’ sèngko’ lagghuna ètoro’a buntè’ bhâi dâri jhâuânna, sopajâ engko’ taowa apa sè dhaddi sabâbbhâ”. Kalagghuânna ghi’ bhuru moncar arè kerbhuyyâ la padâ èpakaloar dâri kanḍhângnga bârâmma ri’-bâri’na. Empo Kelleng ngabâssaghi kerbhuy sè potè kaloar sarta ajhâlâ enneng è ḍâ’-aḍâ’. Bhârengnnga edhina’aghi. Empo Kelleng pas noro’ buntè’ ḍâri jauânna. Sanapa’na ka alas kerbhuy sè potè pas terros ka bâbâna kajuân rajâ. Empo Kelleng noro’ buntè’.
Saellana napa’ ka bâbâna kaju, Empo Kelleng lajhu nemmo bhâbhâji’ lalakè’ kasorang èsosoè kerbhuy sè potè jârèya, robâna talèbât bhaghus, cahyana tèra’. Kapèraghân bân kabhunga’anna Kè Empo taḍâ’ bhâbhânḍhinganna, sabâb abâ’na lakar cè’ terrona sè anḍi’â ana’. (2-3)
Komentar
Posting Komentar